ब्रेकिंग

भरधाव मोटारीने अनेक वाहनांना उडवले

Samruddhi Dhayagude
12 May 2025

पुणे : भरधान वेगाने जाणार्‍या मोटारीने पाच ते सहा वाहनांना धडक दिल्याची घटना कोथरूडमधील निंबाळकर चौकात शनिवारी रात्री नऊच्या सुमारास घडली. या घटनेत कोणतीही जीवितहानी झाली नाही. मात्र, दुचाकी वाहनांचे मोठ्या प्रमाणात नुकसान झाले आहे. दरम्यान, अलंकार पोलिसांनी मोटार चालकाला रविवारी ताब्यात घेतले.

हृषीकेश सुंदर पुजारी (वय ३३) असे ताब्यात केलेल्या मोटारचालकाचे नाव आहे. हृषीकेश पुजारी हा शनिवारी रात्री थार या अलिशान मोटारीतून कोथरुड परिसरातून सिटी प्राईड चित्रपटगृहाकडे निघाला होता. सिटी प्राईड परिसरात आल्यानंतर त्याचे गाडीवरील नियंत्रण सुटले त्यामुळे रस्त्याच्या कडेला लावलेल्या पाच-सहा दुचाकीला धडक देत गाडी पुढे गेली. त्यानंतर त्याने तेथून पळ काढला, परिसरातील नागरिकांनी तातडीने पोलिसांना संपर्क केला.

पोलिसांनी तातडीने घटनास्थळी धाव घेत गुन्हा दाखल केला. काही नागरिकांनी त्याच्या गाडीचा नंबर पाहिल्याने त्यावरून पोलिसांनी रविवारी सकाळी त्याचे घर गाठले आणि हृषीकेश सुंदर पुजारी याला घरातून ताब्यात घेतले. त्याने मद्यप्राशन करून गाडी चालविली होती का? याचा तपास करण्यासाठी त्याची ससूनमध्ये वैद्यकीय चाचणी करण्यात आली आहे. अद्याप चाचणीचा अहवाल आला नसून चाचणी अहवाल आल्यानंतर नेमका अपघात कशामुळे झाला हे स्पष्ट होणार आहे.